HISTORIA DA FESTA DA PATACA
Se nunca probaches a Pataca de Coristanco esta é a mellor ocasión, unha festa gastronómica diferente coa raíña da horta da zona como protagonista, a Pataca.
Cando se celebra a Festa da Pataca de Coristanco?
A Festa da Pataca celébrase cada ano o terceiro domingo de setembro desde o ano 1980. Está declarada Festa de Interese Turístico de Galicia e foi unha das primeiras festas gastronómicas que se celebraron na comunidade galega.
A festa é unha manifestación cultural e social que pon en valor a vida rural da zona e o traballo agrícola arredor do cultivo da Pataca.
Durante toda a fin de semana desfrútase e degústase á raíña da festa, a Pataca de Coristanco.
Celébranse concursos gastronómicos, diferentes showcookings, rutas de petiscos, esculturas de pataca, exposicións variadas, concertos, actividades infantís…
Que é o que non te podes perder na Festa da Pataca?
Un dos maiores atractivos turísticos son as figuras ou esculturas feitas con pataca. Non cho podes perder! Son verdadeiramente espectaculares e inxeniosas.
Outro imprescindible é a Empanada de Pataca de Coristanco, unha auténtica delicia! Podes degustala entre diferentes propostas gastronómicas todas coa Pataca como ingrediente principal.
O sábado pola noite celébrase a Sardiñada Popular na praza de Coristanco.
A xornada do domingo comeza cunha concentración e desfile de tractores engalanados. Outra das actividades destacadas da fin de semana.
Se queres vivir unha festa gastronómica diferente, vén á Festa da Pataca de Coristanco!





























