Se hai un curro que se vive de maneira especial na Serra da Groba, ese é o Curro de San Cibrán, que se celebra cada ano en Donas, Gondomar.

Este curro é dos máis novos da zona, pero o que o fai realmente único —e digno de ver— é ese momento máxico no que os cabalos baixan dende a parada ata o curro guiados por un auténtico “pasillo humano”.

Si, como o escoitas! Os cabalos son guiados polos agarradores, polos propietarios e por toda a xente que se anima a participar nesta xornada, formando un pasillo con varas de madeira e bastóns. Así, ombro con ombro, van conducindo ás eguas, poldros e garañóns para que ningún se saia da senda.

Este “cordón humano”, como se adoita chamar, é un dos símbolos do Curro de San Cibrán. Non só amosa a organización e o traballo en equipo, senón tamén o afecto e o respecto por manter viva unha tradición que conecta ás persoas co monte e cos cabalos.

Dende primeira hora da mañá, coma nos demais curros, os besteiros adéntranse nos montes da Groba para xuntar as greas. Máis tarde chega o gran momento: a baixa polo “pasillo humano” dende o alto de Pedras Miúdas, cunhas vistas espectaculares do Val Miñor e un ambiente cheo de emoción.

Xa pola tarde, unha vez no curro, realízanse os traballos de sempre: marcaxe, separación de poldros, “rapa” (o corte das crinas), desparasitación… e, como non, a solta dos animais de novo ao monte.

O Curro de San Cibrán é unha experiencia comunitaria, unha mostra de tradición viva e unha desculpa perfecta para achegarse ao monte, aos cabalos e ás nosas raíces.

Entrada de balde.