ORIXE DA QUEIMA DAS FACHAS DE CASTELO
A Queima das Fachas de Castelo – Taboada é toda unha festa do lume. Algo tan ancestral que non vas atopar en ningunha outra parte. Por iso está recoñecida como Festa de Interese Turístico de Galicia e como Ben de Interese Cultural, no apartado de patrimonio inmaterial.
Trátase dunha tradición milenaria de inicio incerto, xa que non se ten constancia escrita. E sobre a súa orixe non hai consenso: uns din que sería unha forma de comunicarse entre os antigos poboados castrexos, e outros o relacionan a rituais máxico-relixiosos celtas.
Que é unha facha e en que consiste a Queima das Fachas?
O que se coñece nesta zona como facha, é noutras de Galicia un facho, fachuco, fachón, ou fachico.
A festa comeza un ou dous meses antes, cando as familias soben ao monte para colleitar os talos de miles de agucios (varitas de San Xosé). Despois póñense a secar. E cando están secas collen un longo pau de madeira, normalmente de piñeiro, de ata dez metros de altura, e ao redor del van atando as varitas.
Todos queren facela alta e grosa para que sexa a que arda máis tempo.
A tarde do 7 de setembro sóbense as fachas ao Castro de Castelo e crávanse ben na terra en forma de círculo.
Á noitiña comeza a festa ao son das gaitas e ao sabor do polbo. Tras a enchenta e preto xa da medianoite, acéndense as fachas (unhas 30) por riba coma se fose un misto.
É magnético ver como o lume descende aos poucos. Todo un espectáculo visible de lonxe.
Cando se celebra?
A festa Queima das Fachas de Castelo no municipio de Taboada (Ribeira Sacra de Lugo) celébrase sempre na noite do 7 de setembro.
Por que tes que ir?
Porque é importante manter unha tradición milenaria galega que se traslada de xeración en xeración, na que cada membro da familia involúcrase xa desde pequeno.
Pero sobre todo, porque a Queima das Fachas de Castelo – Taboada é unha viaxe á cultura ancestral galega arredor do círculo de lume. Unha noite chea de luz, enerxía e troula.

















