No máis alto do monte de Neipín, entre a néboa e os ventos que acariñan a serra da Pontenova, esta aldea recuperou no 2024 unha das súas tradicións máis auténticas: A Rapa das Bestas de Neipín. Aínda que durante anos só se realizaba unha pequena demostración nunha das casas do lugar, foi o 20 de xullo de 2024 cando, por primeira vez, os cabalos salvaxes baixaron ao curro diante do público para revivir un costume ancestral con toda a súa forza e emoción.

Organizada pola asociación Equus Norte, esta festa non só honra a conexión profunda entre o ser humano e o cabalo, senón que tamén celebra o respecto pola natureza, o valor comunitario e a identidade rural galega.

Desde primeira hora, o aire do Alto de Neipín encheuse de expectación. Os cabalos chegaron do monte, maxestosos e libres. No curro, os aloitadores cortáronlles as crinas nun ritual de respecto e coidado. Unha xornada onde a tradición se xunta coa celebración: espectáculos de doma, sesión vermú, música e polbo á feira que reúne a familias, veciños e visitantes.

Neipín súmase ás históricas rapas da comarca, como as de Candaoso en Viveiro ou Campo do Oso en Mondoñedo, deixando claro que as novas xeracións tamén saben mirar ao monte con ollos de respecto e orgullo.