A Foliada de Melide comezou en maio de 2005 cando a Asociación Cultural O Castelo organiza en Melide unha reunión festiva con distintos grupos e asociacións folclóricas da contorna. Ao ano seguinte volve celebrala coa colaboración do concello de Melide. E durante o último domingo de abril sucédense na vila diferentes actividades: ruadas, mostra de artesanía, exposicións, conferencias, obradoiros, actuacións e concerto.

É en 2009 cando amplía a súa duración aos dous días da fin de semana, incorporando o concurso de cantos de taberna.

Cando se celebra a Foliada de Melide?

A Foliada de Melide celébrase anualmente a última fin de semana de abril.

Por que non cha podes perder?

Non cha podes perder se che vai a festa. Porque foliada é sinónimo de festa, que é o que nos gusta en Galicia, e quizá por iso temos tantas palabras relacionadas: folía, algueirada, carallada, chola, esmorga, gandaina, pándega, rexouba, riola, ruada, troula, trouleo, xolda.

O denominador común da Foliada de Melide é pasalo ben, sen que falten a música, o canto e as risas. E por iso o evento estrela é o Concurso de Cantos de Taberna, no que grupos folclóricos de toda Galicia percorren a zona dos viños de Melide, amenizando coa súa música e cantos tradicionais a mañá e tarde do sábado. As rúas énchense de sons de pandeiretas, gaitas e ailalelos.

Que máis che vas a atopar na Foliada de Melide?

A Foliada de Melide é moito máis, é enxalzar a artesanía, cultura e tradición galega. Así que poderás gozar durante toda a fin de semana de: obradoiros de baile galego para nenos e adultos, mostra de artesanía e instrumentos, xigantes e cabezudos, sesión vermú, orquestra, xogos populares, exhibición de baile tradicional e concertos, como o da edición do 2022 na que estiveron as Tanxugueiras.

En resumo, bo ambiente, música polas rúas e bares, e moita, moita foliada.

“Quedei namorada”, é o que dirás ti ao ir por primeira vez.

Así que colle a túa pandeireta e garda a data na túa axenda festigaleira, porque a Foliada de Melide é para festigaleiros de pura cepa.