Cada ano, no corazón da comarca do Deza, en Lalín, celébrase unha das feiras gastronómicas máis emblemáticas de España: a Feira do Cocido de Lalín.
Esta festa popular, que naceu hai máis de medio século, non só rende homenaxe ao tradicional cocido galego, senón que se converteu nun fenómeno cultural, social e turístico que atrae a milleiros de visitantes que buscan gozar do auténtico cocido galego.

As orixes da Feira

A primeira Feira do Cocido celebrouse en 1969 en Lalín co obxectivo de poñer en valor o cocido e os excelentes produtos da zona. Desde entón, ano tras ano, a feira non deixou de medrar, converténdose nun referente dentro do calendario festivo galego.

En 1999 recibiu o título de Festa de Interese Turístico de Galicia, no ano 2010 foi declarada Festa de Interese Turístico Nacional e, desde o ano 2020, a Feira do Cocido de Lalín conta co prestixioso recoñecemento de Festa de Interese Turístico Internacional, sendo a primeira festa gastronómica de España en acadar esta distinción.

Ingredientes do Cocido de Lalín

Os compoñentes clave do cocido de Lalín son:

• Carnes de porco (saladas/curadas): principalmente lacón, cacheira (cabeza), espinazo, costela, morro, orella, uñas, lingua, rabo e touciño entrefrebado.
• Embutidos: chourizos de carne e chourizos ceboleiros.
• Aves e tenreira: galiña da casa e faldra ou xarrete de tenreira.
• Verduras e legumes: grelos, repolo, patacas e garavanzos.
• Toque tradicional: unto (graxa de porco rancia) para dar sabor ao caldo.

Adoita servirse separando a sopa (con fideos) do resto, que se presenta en distintas fontes: unha para a verdura con patacas, outra para os garavanzos e os chourizos, e outra para as carnes.

Cando se celebra a Feira do Cocido?

A feira celébrase tradicionalmente o domingo anterior ao domingo de Entroido, marcando o inicio dunha intensa tempada gastronómica que se estende con actividades previas e posteriores, coñecida como o Mes do Cocido, durante o cal se poden gozar de múltiples actividades como a Matanza Tradicional do Porco ou a Gala do Cocido, entre moitas outras.

O día grande da feira está cheo de actividades: desfiles de carrozas, comparsas e charangas, a lectura do pregón a cargo dunha personalidade destacada, actuacións folclóricas, obradoiros, concursos, degustacións e eventos paralelos que potencian a difusión do cocido e dos produtos locais.

Esta combinación de tradición, gastronomía e festa converte a Feira do Cocido nunha experiencia única para quen a visita.
Para nós… un evento moi, moi recomendable!