Cada verán, este pobo mariñeiro da Mariña lucense rende homenaxe ao seu produto máis famoso: o Bonito do Norte. A Feira do Bonito, declarada Festa de Interese Turístico Nacional, reúne a milleiros de persoas que chegan cun obxectivo moi claro… ¡comer un dos mellores bonitos do mundo!

Pero… ¿que fai tan especial ao bonito de Burela?

Non é só o mar Cantábrico, cuxas augas son perfectas para esta especie. O segredo tamén está na forma de pescalo.

En Burela, o bonito captúrase un a un, con anzol, utilizando unha técnica tradicional coñecida como cacea ou curricán. É unha pesca sostible e moi respectuosa co produto, que permite que cada peza chegue ao porto en condicións excepcionais. O seu porto é un dos grandes portos boniteiros do Cantábrico e a pesca forma parte da identidade do pobo desde hai xeracións. Aquí o mar non só dá traballo; tamén creou unha forma de vivir e de entender a tradición.

¿Que atoparás na Feira do Bonito?

Poderás degustar o bonito na carpa principal a prezos populares e preparado de diferentes maneiras. Tamén hai un amplo programa de actividades con música en directo, actuacións folclóricas, actividades para todas as idades e un ambiente que converte as rúas de Burela nunha auténtica festa.

Entón… ¿merece a pena visitala?

Se che gusta a gastronomía galega, a Feira do Bonito de Burela é unha cita imprescindible. Unha oportunidade para saborear un produto único, descubrir a historia dun pobo volcado co mar e gozar dunha das celebracións máis auténticas do verán galego.

¡Vémonos en Burela, Festigaleiros!